Stipendiat

Stipendiat innan forskingsprosjektet Singing Maps

Ved Høgskulen på Vestlandet (HVL) er det ledig ei stilling som stipendiat innan forskingsprosjektet Singing Maps: developing online music communities to support Sámi adolescent cultural resilience, ved Fakultet for lærarutdanning, kultur og idrett. Stillinga inngår i Institutt for kunstfag, campus Bergen.

Om prosjektet

Forskingsprosjektet Singing maps er eit 4-årig (2025-2029) forskingsprosjekt finansiert av Forskningsrådet som skal bygge kunnskap om og utvide deltaking av samiske ungdommar i samiske musikaliske tradisjonar. Prosjektet undersøker sentrale spørsmål rundt kulturell berekraft, urfolks resiliens, eigarskap, ansvar og kulturell identitet i samisk kontekst.

Om stillinga

Stipendiatstillinga vil vere knytt til Singing Maps-prosjektet med ei musikkpedagogisk forskingsinnretting, og vil særskilt koplast til forsking på samiske vokale tradisjonar og kandidaten si eiga kunstnarleg verksemd og identitet. Stipendiaten vil leie ein sjølvstendig forskingsstudie som brukar kunstnarleg utviklingsarbeid/autoetnografiske metodar.

Ansvars- og arbeidsområde

• Gjennomføre eige ph.d.-prosjekt innan ei tidsramme på 3 år.
• Delta i obligatorisk del av doktorgradsprogrammet «Studiar av danning og didaktiske praksisar».
• Bidra aktivt i forskargruppa Singing Maps.
• Samarbeide med seniorforskarar, tradisjonsberarar og andre studentar for å utvikle vitskaplege publikasjonar, seminar og pedagogisk materiale.