Avdelingsoverlege medisin Odda sjukehus

Vil du leie medisinsk fagutvikling ved eit av Noregs mest unike lokalsjukehus? Ved Odda sjukehus har vi no ledig fast stilling som avdelingsoverlege i medisinsk fagområde. Dette er ei nøkkelstilling for deg som ønskjer å kombinere klinisk arbeid med fagleg leiing, utvikling av tenesta og vidareutvikling av framtidas lokalsjukehus.

Odda sjukehus er ein viktig del av Helse Fonna sitt akuttilbod og gir tenester til innbyggjarane i Hardanger og indre delar av Sunnhordland. Sjukehuset har akuttmedisinsk beredskap, poliklinikkar og sengepostar innan fleire fagområde, og er kjenneteikna av korte avstandar, brei kompetanse og tett samarbeid på tvers av profesjonar.

Kva går jobben ut på?

• Medisinskfagleg rådgiving til avdelingsleiing og klinikkleiing.
• Medverke til strategisk utvikling av medisinsk teneste ved Odda sjukehus.
• Delta i leiarmøte og bidra til utvikling av robuste pasientforløp.
• Fagutvikling og oppfølging av overlegar og LIS-legar, og bidra til framtidig rekruttering.
• Bidra til god utdanning, supervisjon og rettleiing av legar i spesialisering.
• Sikre kvalitet og pasienttryggleik gjennom kontinuerleg forbetringsarbeid.
• Delta i klinisk arbeid, vakt og beredskap etter avtale.

Kvifor skal du velje oss?

Hos oss får du ei sentral rolle i eit framtidsretta lokalsjukehus med moglegheit til å påverke utviklinga av medisinske tenester. Vi tilbyr eit godt arbeidsmiljø, tilrettelegging for fagleg utvikling, konkurransedyktige løns- og arbeidsvilkår, samt hjelp til bustad og støtte til familieetablering.